港股其實唔係全年都由頭衰到尾，年初嘅時候，曾經威過，當時更加有東升西降嘅講法。

 

自2022年二十大會議後，政策密集出台，先有救市16條， 再有防疫新十條，揭開炒作內地救樓市、同放棄防疫嘅緊箍咒。恒指連環受惠，今年1月26日初五啟市，升522點，初六升至22700點，亦是全個2023年高位。

 

好快，第一隻黑天鵝橫空出現。說是橫空，但也可以說是必然結果，美國銀行爆發危機，同債息抽升有直接關係。因為要打擊通脹，聯儲局同各地央行，喺2022年首季展開加息行動，在2022年下半年加得非常急進，不斷上升的利率對債市產生了負面影響，令持有債券嘅銀行面臨重大損失。另一方面，存戶開始在其他地方尋找更高的利率回報，存款流失，令美國銀行業遭遇了08年金融危機以來最嚴重的擠提及倒閉潮，銀行業面臨6,840億美元的賬面虧損，幾十家地區銀行陷入困境，部分甚至破產。在矽谷銀行 SVB倒閉後，聯邦儲備局為存款機構提供額外資金，又提供長達一年的貸款。存戶存款獲100%保障，避免再發生擠提。加上在瑞士政府壓力下，瑞士銀行（UBS）收購崩潰的瑞士信貸（Credit Suisse），避免銀行信心危機進一步蔓延，成為全球近15年來首宗系統性重要銀行合併。

 

政府迅速回應令事件好快平靜落嚟，對港股嘅影響亦相對輕微。三月中的港股，甚至出現過小升浪。正當股市貌似回升之際，3月28日，阿里巴巴（09988）主席兼首席執行官張勇，宣布集團創辦24年來最重要的組織變革，構建「1+6+N」組織結構，阿里巴巴集團成為控股公司，在阿里巴巴集團之下設立六大業務集團，未來具備條件的業務，有獨立上市的可能性。不過不用一年，11月第二季業績時公布，盒馬鮮生的(IPO)計劃及阿里雲全面分拆已被擱置，但物流業務菜鳥已申請在香港IPO，但而家仲未有咩新消息。

 

叠加內地債務危機、人民幣迅速貶值、銀行定存搶客、港股一底低於一底。不過救市措施亦陸續有來，八月底，內地證券交易印花稅減半，是內地相隔15年後再次下調證券交易印花稅。九月初，各地開始「認房不認貸」等救市措施，隨後又有匯金入市，發債萬億等等。不過，要穿嘅三千點始終都係要跌，上證指數又要再打3000點守衛戰。

 

至於樓市，雖然有「史詩級式的鬆綁」，但房地產供應過剩，14億人可能住不完，相信調整期非常漫長。令市場再出現指內地樓市泡沫爆破，正步入日本迷失X十年後塵嘅言論。恒大停牌年半後，於8月28日起復牌，9月底再停牌，幾日後復牌，恒大集團發公布指，主席許家印因涉嫌違法犯罪，已被依法采取强制措施。而一拖再拖嘅恆大破產聆訊，一再押後至2024年1月。如果清盤令頒布的話，負債約3,270億美元的恒大將成香港法律史上被清盤的最大型發展商，有機會對內地樓市造成更多打擊及不確定性。因恒大苦主眾多，二萬幾億人民幣嘅債點清理，相信繼續係整個經濟嘅重型炸藥。

 

恒指由2023年一月，下降通道無咩走失過，就滑到落12月，低見15972，驚嚇冬至加聖誕禮物有來自內地遊戲行業嘅徴求意見稿，要對行業進一步限制，網易單日暴跌24%、騰訊跌12%。不過全年計，騰訊網易唔算傷，藍籌股中，李寧最傷，碧桂園服務緊隨其後，之後仲有美團、中升、藥明。表現理想的有理想汽車、聯想集團、中石油、中海油、小米、滙豐同中移動。

 

年頭所講：東升西降唔算錯，因為日股、台股、韓股表現突出，日股升至三十多年高位，受惠憧憬減息，美金疲弱。但A股同港股是跌市。而西亦係無降。可以話係東升西升。

 

道指、標普、納指都有不錯表現如果有一啲美股持倉，特別係大型股的話，今年應該會係豐收。七大科技股表現，突出。企業風雲人物，仲有因人工智能同ChatGPT搶鏡成功的，包括英偉達的黃仁勳，以及OpenAI的Sam Altman. 

 

今年全年，年初開始擔心衰退、硬著陸，但到年尾都沒有出現。美息加咗11次後，累計上升525個基點，通脹回落，9月開始停加。帶動黃金破位，美債息見頂，美債市終於回穩。

 

未來一年，相信市場會轉為擔心經濟衰退情況。市場估計，2024年上半年開始有減息機會。每次議息會議，都等鮑威爾嘅講話，周不時都會聽到 Pivot, Sticky inflation, Hawkish Pause, higher for longer. 學識唔少新嘅講法。這兩年，他可以說是影響全球資金流向最關鍵人物。

 

另一位風雲人物，要數幣安創辦人趙長鵬。今年6 月，美國證券交易委員會 SEC 對幣安交易所及趙長鵬提出起訴，指控幣安及趙長鵬違反《證券法》，並提出13 項指控。11 月刑事調查終於塵埃落定，幣安將向美國財政部支付高達43 億美元的罰款，創下史上最高和解金額。同時，趙長鵬同意承認反洗錢指控，並支付5000萬美元罰款，卸任幣安CEO。加密市場聞聲下跌，比特幣一度跌破36,000 美元，但資金流出低於預期。雖然明年可能入獄，但今年趙長鵬嘅身家大反彈。加密貨幣市場在2023年迎來反彈一年，比特幣（Bitcoin）、以太幣等價格回升，據報道，趙長鵬的財富在2023年增長高達250億美元（約1,950億港元），估算擁有約370億美元（約2,886億港元）財富。今年以來，比特幣價格為約42,649美元，相比2023年1月1日約16,547美元大幅上升1.6倍。

 

去到2023年尾聲，投資界傳奇人物、股神巴菲特的拍檔，巴郡（Berkshire Hathaway）副主席查理．芒格上月去世，享年99歲。上一次股東大會，佢話會係佢最後一次出席，後來接受訪問時，仲提到1月1日100歲生日會開party。這位投資界的傳奇雖然已經去世，但他的投資智慧，仍然會留存後世。

 

InvesTalk喺今年，雖然打逆境波，但仍然努力生存，希望大家繼續支持，未訂閱嘅比個訂閱，訂閱咗嘅比個留言或者比個like, 多謝大家。2023年到尾聲，祝大家有個更豐盛同順利嘅2024，出年見！